ИНТЕРВЈУ: ВЕСТ
Ако не влезам во финале, ќе работам на брод
Пред пет години беше "Од нас зависи", а годинава "Мојот сон" е песната со која поп-sвездата Каролина Гочева по вторпат ќе ја претстави Македонија пред големото европско музичко семејство - Евровизија.
- Пред пет години рече: "Не да одам веќе, ќе оставам колегите да го почувствуваат тоа искуство". Сепак доби втора шанса. И што си посакуваш пред заспивање?
- Ако некој сака да се случи најдоброто во Хелсинки, тоа сум јас. Но нормално е дека има страв. Минатиот пат кога настапував немаше полуфинале, беше полесно. А сега треба да се обезбеди и пласман во финале. Оваа година е потешко и затоа што учествуваат 28 земји, а само 10 одат напред. Поради тоа ми е најмногу страв. Интензивно се работи на нашето што подобро претставување. Се уште не знам како ќе бидам облечена, но знам дека тоа ќе биде кусо здолниште.
- Што мислиш што ќе се случи ако не влеземе во финале?
- Ако не дај боже, не влеземе, нема да го сметам за неуспех, зашто премногу е тешка конкуренцијата. Но знам каква е реакцијата кај нас по секоја Евровизија. Што би правела? Што би рекол Дадо Топиќ - ако не влезам во финале, ќе одам да работам на брод. Ха, ха, ха.
- Првпат правиш концерт во "Метрополис арена", што е голем залак за многу домашни пејачи.
- "Метрополис арената" е голем предизвик и мислам дека ќе биде незаборавен. Очекувам навистина добра журка.
- Според сето она што го имаш постигнато, се сметаш ли за sвезда?
- И светските sвезди ги среќаваат на улица, ама тоа е Холивуд. Таму се е поголемо, а кај нас се е помало. Не се чувствувам како sвезда туку како нормална, обична девојка.
- Но секоја обична девојка нема стан од 80 квадрати и не вози "Пежо 207".
- Да, така е. Но мислам дека е нормално кога некој целата енергија и труд со години ги вложува во она што го работи, да има стан и кола. Имам стан од 80-ина квадрати, го средив по мој вкус и од неодамна "пежо 207" од серијата " Каролина", со додатна опрема. Веќе два месеца имам возачка дозвола и мислам дека се снаоѓам низ скопските улици. Можеби ќе имав кола и досега, но никогаш нешто посебно не сум сакала да возам.
- Поубаво ти беше да те возат дечковци, отколку ти да си зад воланот?
- Никогаш не сум фатила дечко само поради тоа што има кола. За дечко треба нешто повеќе од добра кола.
- Се трудиш да го скриеш твојот приватен живот, но ниедна твоја врска досега не останала незабележана.
- Да, сакам да скријам, ама тоа тешко ми успева. Нели е приватен живот и затоа сметам дека таков треба и да остане. Па и јавните личности имаат право на тоа. Затоа и јас најмалку сакам да зборувам за приватноста. Сите врски почнале со одредена причина и завршиле од некоја причина.
- Добро, ајде да не ги споменуваме бившите, ама кажи дали е вистина дека си во љубов со фудбалерот Горан Пандев?
- Чаршијата зборува поради фотосесијата каде што други ни кажуваа какви пози треба да правиме. Дали да се гушнеме, да се фатиме за рака, да ги доближиме главите. Но тоа беше само куса средба и толку. Ниту дотогаш ниту оттогаш сум се видела со Горан.
- А примаш ли уште СМС пораки од харизматичниот хрватски водител Тарик Филиповиќ?
- Со Тарик се познаваме неколку години и сме се виделе неколку пати, ама само на кафе и доволно сме другари да си раскажуваме за нашите приватни животи и поради далечината да си пишуваме пораки. И толку. Од мене и Тарик не чекајте нешто повеќе.
- Сакаш да кажеш дека во моментов си сама? Дека не си вљубена?
- Да, сама сум. Ама вљубена сум. Па јас секогаш сум вљубена, без разлика дали сум во врска или не.
- Имаш 27 години. Размислуваш ли на тема време е за брак?
- Размислувам, како не размислувам. Најважно ми е во бракот да има разбирање и поддршка. Особено за некој што ја има мојата професија. Немам стереотипи да биде восок, со црни или со сини очи или не знам каква коса.
- За тебе велат дека си преубава, ама и дека треба да качиш некој килограм?
- А дали вакво прашање им поставуваш на мои колешки кои треба да симнат некој килограм? Не сметам дека треба да се здебелам зашто се чувствувам супер, здрава сум и можам да облечам што сакам. Не држам диети, ама балансирам со исхраната, како и со се останато во мојот живот...
