- Ќе се обидам да ја претставам нашата земја во најдобро светло, како што заслужува. Многу ми е мило што имам шанса да одам на "Евровизија" и да покажам дека Македонија знае да пее - изјави Каролина.

- Дали ова беше очекувана победа?
- Не, воопшто не е очекувана, но е добредојдена. Пред Фестивалот не сакав ниту да размислувам за тоа. Секако дека сакав да победам, како и сите други учесници, но не мислев дека толку убедливо ќе го освојам првото место. Со оглед на моето досегашно искуство на фестивалските сцени и особено знаејќи како се одвиваа нештата на претходните избори за евровизиска песна, годинава настапив без големи оптоварувања и опуштено. Се чувствував пријатно, за што најмногу придонесе публиката.

- Композицијата "Од нас зависи" и е посветена на Македонија. Кога првпат го слушна материјалот што го подготвија авторите Пере и Франц?
- Со нив соработувам подолго време и "Од нас зависи" е само успешно продолжување на таа соработка. Песната ја слушнав пред пет-шест месеци и веднаш ми се допадна. Откако влезе во изборот, работевме на нејзината крајна форма. Повторно и посветивме песна на Македонија, зашто многу ја сакаме и ако треба, ќе направиме уште илјада песни за неа.

- Уште на генералната проба имаше одлична реакција од публиката. Колку тоа ти влеа сигурност? Дали имаше трема?
- Секогаш на генералните проби имам најмногу трема - така беше и овојпат. Публиката на пробата беше поинаква од таа на изборот, имаше многу помлади луѓе, кои реагираа на сите пејачи што ги сакаат. Затоа тоа не мораше да биде сигурен показател кој ќе победи. Но, бев среќна што наидов на таква реакција. Аплаузот навистина влијаеше мошне мотивирачки.

- Дали на "Евровизија" сакаш да пееш на англиски или на македонски јазик?
- Тоа се уште не е решено. Би сакала да ја отпеам песната и на англиски, зашто така ќе биде поприемчива за секое уво, но сакам да ја пеам и на македонски за да слушнат сите дека и нашиот јазик може да звучи прекрасно во прекрасна композиција. Не сум за комбинација на двата јазика. Мислам оти треба да се отпее само на еден јазик.

- На каков пласман се надеваш во Естонија?
- Рано е да се зборува за очекувања, бидејќи има речиси три месеци дотогаш, но тоа што зависи од мене ветувам дека ќе го направам најдобро што можам. Нема да се расфрлам со преоптимистички изјави, туку мирно и тивко ќе работам на својот настап и на презентацијата во Естонија.

- Дали и на сцената во Талин ќе се појавиш во истиот костим?
- За осмислувањето на мојата гардероба беше задолжен креаторот Алаксандар Ношпал, во чии креации се појавувам се почесто. На мојот изглед работеа и Сретен Котиќ, Дејан Милиќевиќ и Владо Георгиев. Ношпал ми сугерира да го носам истиот фустан и во Естонија. Се уште не знам, но можеби повторно ќе се решам за овој костим, бидејќи е впечатлив и ги има боите на нашата земја.